اتطلقتى ؟؟ مبروك
 |
| سعدت بالطلاق ولا تعل |
وده كان اول الحوار ما بين امرأة تطلقت حديثاً وبين اخاها وتابع قائلا:
عارفة قصتك بعد الطلاق ولا مش عارفاها ؟
اقولك أنا.
اللى حواليكى هيقولولك الف مبروك خلصتى منه و من قرفه وانتى هتجيلك حالة غريبة ما بين نشوة الانتصار على التفكير فى المستقبل الغامض و الانعزال.
طب بعد كدة ؟
اعملى حسابك مفيش حد عازب هيفكر يتجوز حضرتك لان ببساطة مفيش حد من اهله هيوافق على كدة ده لو حتى هو موافق و،ممكن يقاطعوه ده غير الكلام اللى هيتقال عليكى فى الحالة دى انك خطفتى الواد و بلفتيه او عملتيله عمل.
لو ليكى اخوات رجالة متجوزين خلى بالك ستاتهم هيحفلوا عليكى أحلى تحفيل و هتكونى منبوذة منهم و ممكن يفرضوا على اجوازهم انهم يقاطعوكى حتى لو كانوا اخواتك واقفين جنبك فى المحاكم.
معاكى اولاد ؟ حلو اوى اعرفى انك لو صغيرة او حتى جميلة فرصتك فى الجواز التانى هتكون ضعيفة ولو حصل هتلاقى واحد قد ابوكى او مطلق زيك و عايزك تربيله العيال يعنى شغالة.
هتنزلى تشوفى شغل هتلاقى كل الناس طمعانه فيكى و حتى لو فيه رجالة اتعاطفوا معاكى فاعرفى انهم بينصبوا لك شبكة عشان تقعى فيها ومش هوضح اكتر من كدة
لو طليقك رافع عليكى رؤية
هتضطرى كل اسبوع تاخدى الاولاد و تقعدى سواء الراجل جيه او مجاش عشان ميرفعش قضية تعويض و القرش بيوجع اوى
طليقك هتفكرى فيه تانى و هتحاولى ترجعيله بس بعد ما يكون اتجوز غيرك او حتى مش متجوز بس مش طايق يسمع اسمك من اللى شافه على ايدك.
زميلاتك فى الشغل هيتغامزوا عليكى من ورا ضهرك و مفيش واحده فيهم هتعرفك حتى انها اتخطبت او لو متجوزه هتحاول تبعد جوزها عنك لانك فى نظرهم ( خطافة رجالة) حتى لو انتى فى حالك.
الشيئ الوحيد اللى هتحسى بيه انك بتاخدى حقك وهو انك تطلعى الاولاد اللى معاكى مسمومين من ناحية ابوهم و ميالين ليكى لدرجة انك هتفرحى اوى لو طلعوا مش متربيين و بيشتموا ابوهم يعنى أذاكى مبقاش لنفسك بس لا انتى اذيتى العيال فى نفسيتهم و شخصيتهم.
الآخر خالص هتحسى بندم شديييد جدا و هترجعى شريط حياتك و تقولى ايه اللى عملته فى نفسى ده و ايه اللى وصلتله و هتتمنى لو كان حد من أهلك وقف ضدك وقتها و ماساعدكيش على خراب بيتك.
ولادك فرصتهم فى الجواز من ناس محترمة هتكون ضعيفة و هيخافوا منك و انهم يناسبوا ابنك او بنتك.
الاخر هتلاقى اولادك طالعين غير اسوياء حتى لو،بيموتوا فيكى و،بيعادوا ابوهم فده اكبر دليل على انهم غير اسوياء و ممكن يطلعوا بايظين شباب او بنات.
خلى بالك انتى بتزرعى حياتك بزرع وحش اوى و حصاده هيكون وحش برضوا.
واخيراً.
فيه ستات كتيرة مظلومة وفيه ستات كانت ممكن تستحمل وفيه ستات اتقمصت وعاشت فى الدور وطلبت الانفصال .وفيه امهات كتير بتتسبب فى طلاق بناتها وبتتدخل فى حياة بنتها وبتأمرها كأن الزعل يخصها شخصياً . وساعد على كده قانون الاحوال الشخصيه اللى بيجعل البيت كله من حق الزوجه فالبنت بتقول انا مش خسرانه حاجه لانى اخدت عفشى كامل و زياده عليه عفش جوزى وما أخدتش بالها ان العفش لما بيتفرش بيتباع بربع ثمنه . انا كلامى عن اغلب حالات طلاق النواشز المنتشرة دلوقتى واللى يقولى ان معظمهم مظلومين بيضحك على نفسه.و دى وجهة نظر تحتمل الصواب و،الخطأ....💔...
تحياتى
مرحبا بكم سيتم الرد على تعليقكم بأسرع وقت